यशवंत बँकेतील 112 कोटीच्या अपहार प्रकरणी गुन्हा दाखल :

साताऱ्यातील भाजप नेता अडचणीत,

सिंहवाणी ब्युरो / सातारा :
संगनमताने कट करून बोगस कर्जांच्या माध्यमातून यशवंत को-ऑपरेटीव्ह बँकेत 112 कोटी 10 लाख 57 हजार रूपयांचा अपहार केल्याप्रकरणी भाजप नेते तथा सहकार परिषदेचे माजी अध्यक्ष शेखर चरेगावकर आणि फलटणचे माजी आमदार दिवंगत कृष्णचंद्र भोईटे यांचा मुलगा नरेंद्र भोईटे यांच्यासह संपूर्ण संचालक मंडळ, पाच वरिष्ठ अधिकारी आणि चरेगावकरांचा भाऊ, नातेवाईकांसह 50 जणांवर शनिवारी रात्री उशीरा कराड शहर पोलीस ठाण्यात गुन्हा दाखल झाला आहे.

कराड येथील यशवंत को-ऑपरेटीव्ह बॅंकेच्या लेखापरिक्षणात बोगस कर्ज प्रकरणाच्या माध्यमातून कोट्यवधी रुपयांची अफरातफर झाल्याची बाब समोर आली. त्यानंतर सनदी लेखापाल मंदार शशिकांत देशपांडे यांनी यशवंत बॅंकेचे माजी अध्यक्ष, उपाध्यक्ष, मुख्य कार्यकारी अधिकारी, कराड शाखेतील कर्ज विभागाचे शाखा व्यवस्थापक आणि शेखर चरेगावकरांच्या नातेवाईकांविरोधात कराड शहर पोलीस ठाण्यात फिर्याद दिली आहे.

नेमकं प्रकरण काय?
यशवंत को-ऑप. बँक लि.कराड या बँकेचे अध्यक्ष, उपाध्यक्ष, 5 अधिकारी, संचालक मंडळ आणि तत्कालीन अध्यक्ष शेखर चरेगावकर यांचे 9 नातेवाईक, अशा 50 जणांनी स्वत:च्या आर्थिक लाभासाठी बँकेचे आर्थिक नुकसान करुन संगनमताने 112 कोटी 10 लाख 57 हजार 481 रूपयांचा अपहार केला आहे. बोगस कर्ज प्रकरणासाठी बनावट कागदपत्रे तयार करून तारण न घेता हेतुपुरस्सर कर्ज वितरण केले. जुनी थकबाकी खाती बंद दाखवून नवीन खाती उघडून निधीचा उद्देशबाह्य विनियोग करून अन्यत्र निधी वळवला. तसेच दस्तावेजात फेरफार व खोट्या नोंदी केल्या. पदाचा गैर वापर करून बँकेच्या ठेवीदार व संभासदांच्या हितास बाधा निर्माण केली आहे.
लेखापाल मंदार देशपांडे यांच्या फिर्यादीवरून कराड शहर पोलिसांनी भारतीय न्याय संहिता कलम 61, 316 (2),316 (4), 318 (4), 336 (3), 338, 339,340 (2),3(5) प्रमाणे बॅंकेच्या तत्कालीन अध्यक्ष, उपाध्यक्षांसह एकूण ५० जणांवर अपहाराचा गुन्हा दाखल केला आहे. 9 ऑगस्ट 2014 ते 31 मार्च 2025 या दरम्यान यशवंत को-ऑप बँक लि. कराड याठिकाणी हा गुन्हा घडला असल्याचंही फिर्यादीत म्हटले आहे