गडरक्षण हीच खरी शिवसेवा!
–खासदार छत्रपती शाहु महाराज

आपला मावळा ची भुदरगडवर गडसंवर्धन ; हजारो तरुणांचा सहभाग

सिंहवाणी ब्युरो / गारगोटी :
छत्रपती शिवाजी महाराजांच्या नावाचा केवळ जयघोष करून चालणार नाही, तर त्यांच्या गडांचे रक्षण आणि संवर्धन करण्याची जबाबदारी प्रत्येक मराठी माणसाची आहे, असा प्रभावी संदेश खासदार छत्रपती शाहु महाराज यांनी रविवारी किल्ले भुदरगड येथे दिला. खासदार नीलेश लंके यांच्या आपला मावळा संघटनेतर्फे सुरू असलेल्या गडसंवर्धन आणि स्वच्छता मोहिमेचा आठवा टप्पा हजारो तरुण-तरुणींच्या उपस्थितीत उत्साहात पार पडला. या मोहिमेचा शुभारंभ खासदार छत्रपती शाहू महाराज, आमदार जयंत पाटील आणि ज्येष्ठ सामाजिक कार्यकर्ते व्ही. बी. पाटील यांच्या हस्ते झाला.
यावेळी बोलताना शाहु महाराज म्हणाले, गडांवरील स्वच्छता, मंदिरे दुरुस्ती, सूचना फलक बसविणे हे छोटे पण प्रभावी उपक्रम आहेत. पुढील पिढ्यांसाठी स्वच्छ आणि सशक्त गड सोडून जाण्याचे कार्य नीलेश लंके करीत आहेत. शिवरायांच्या विचारांना लोकांच्या मनात रुजविण्यासाठी ते करत असलेले प्रयत्न खरोखर कौतुकास्पद आहेत. आपला मावळा’ ही संघटना भविष्यात लाखो मावळ्यांना घेऊन शिवकार्याच्या रणांगणात उतरलेली पाहायला मिळेल, असा मला विश्वास आहे.

खा. नीलेश लंके यांनी यावेळी स्वतः झाडू हातात घेऊन स्वच्छतेत सहभाग घेतला. त्यांनी मावळ्यांसमोर सांगितले की लोकप्रतिनिधी म्हणून भाषणांपेक्षा कृतीला अधिक महत्त्व आहे. शिवनेरीपासून सुरू झालेली ही मोहीम धर्मवीर गड, रायरेश्वर, रामशेज, तिकोना, प्रतापगड पार करत आता भुदरगडवर पोहोचली आहे. छत्रपती शिवाजी महाराजांच्या गडकोटांचा हा वारसा अखंड राहावा म्हणून हा उपक्रम आहे. लंके यांनी सरकारकडून गडसंवर्धनासाठी विशेष निधी मिळवून देण्यासाठी प्रयत्न करण्याची ग्वाही दिली.

रविवारी सकाळी आपला मावळाचे टी-शर्ट घातलेले हजारो युवक-युवती फावडे, कुदळ, झाडू घेऊन “जय शिवराय!च्या घोषात गडाकडे रवाना झाले.
कचरा निर्मूलन, झुडपांची छाटणी, वृक्षारोपण, बाके, डस्टबिन, सौरदिवे बसविणे अशा अनेक उपक्रमांनी गड परिसर स्वच्छ व आकर्षक झाला.

यावेळी आर. के. पवार, सत्यजीत जाधव, राहुल देसाई, प्रतिक पाटील, सुदेश सापळे, संतोष मेंगाने, अनिल घाटगे, सुनिल शिंत्रे, रणधीर मोरे, निखिल निंबाळकर, के. के. भारतीय आदींसह ‘आपला मावळा’ प्रतिष्ठानचे कार्यकर्ते मोठ्या संख्येने उपस्थित होते.

खा. नीलेश लंके यांचा साधेपणाचा धडा
खा. लंके यांच्या कार्यशैलीने प्रेरित होऊन हजारो मावळे या उपक्रमात सहभागी होत आहेत. मात्र, यावेळी त्यांनी कोणताही दिखावा न करता आपल्या कार्यकर्त्यांसह पुष्पनगर येथील माध्यमिक शाळेत मुक्काम केला. पहाटे त्यांनी मावळ्यांसह जयघोषात गडाकडे प्रस्थान केले. त्यांचा हा साधेपणा आणि जमिनीशी जोडलेला स्वभाव परिसरात चर्चेचा विषय ठरला आहे.

कोल्हापुरात खा. लंकेच्या सेल्फीची क्रेझ
गडसंवर्धन मोहिमेमुळे खा. लंके तरुणवर्गात लोकप्रियतेच्या शिखरावर पोहोचले आहेत.
भुदरगडवर त्यांनी भेट दिल्यानंतर तरुणांनी सेल्फीसाठी मोठी गर्दी केली, आणि “लंकेसाहेबांसोबतचा एक फोटो” हा दिवसाचा ट्रेंड बनला.