कोल्हापुरात बारा लाखाची घरफोडी :
10 तोळे सोनं आणि रोकड लंपास, शहरात खळबळ

सिंहवाणी ब्युरो / कोल्हापूर:
कोल्हापूर शहरातील भर वर्दळीच्या शाहूपुरी येथील दुसऱ्या गल्लीत राहणाऱ्या शहा कुटुंबाचा फ्लॅट चोरट्यांनी फोडला आहे. अभिजीत राजेंद्र शहा यांच्या फ्लॅटमध्ये शुक्रवारी रात्री आठ ते साडेनऊच्या दरम्यान मोठी चोरीची घटना घडली. दिवाळीच्या सुट्टीच्या निमित्ताने शहा कुटुंबीय त्यांच्या दोन मुलांना शहरातील एका पाहुण्यांकडे सोडायला गेले होते. घरात कोणीही नसताना चोरट्यांनी मुख्य दरवाज्याचा कडी-कोयंडा तोडून आत प्रवेश केला. त्यांनी घरातील लोखंडी आणि लाकडी कपाट फोडून 10 तोळे सोन्याचे दागिने तसेच 50 हजार रुपयांची रोकड चोरी केली. या प्रकाराची माहिती अभिजीत शहा यांनी शाहूपुरी पोलिसांना दिली.

शहा यांनी दिलेल्या फिर्यादीनुसार, चोरीला गेलेल्या दागिन्यांमध्ये साडेचार तोळ्यांचे दोन मंगळसूत्र, दोन तोळ्यांच्या दोन अंगठ्या, दोन तोळ्यांची एक चेन आणि दीड तोळ्यांचे कानातील टॉप्स यांचा समावेश आहे. एकूण दहा तोळे दागिने आणि पन्नास हजारांची रोकड चोरट्यांनी लंपास केली आहे. या चोरीला गेलेल्या मालमत्तेची आर्थिक किंमत मोठ्या प्रमाणात असल्याचे पोलिस तपासात समोर आले आहे.

पोलिसांचा तपास आणि सुरक्षा खबरदारी..
माहिती मिळताच कोल्हापुरातील शाहूपुरी पोलिसांनी तातडीने घटनास्थळी जाऊन पंचनामा केला असून काही वस्तूंवरील ठसे जप्त केले आहेत. परिसरातील सीसीटीव्ही फुटेजचा आढावा घेत चोरट्यांचा माग काढण्याचे प्रयत्न सुरू आहेत. पोलिसांनी या चोरीच्या घटनेवर गांभीर्याने लक्ष देत परिसरात संरक्षण गस्त वाढवली आहे. तसेच नागरिकांना घरातील सुरक्षा अधिक घट्ट करण्याचे, संशयास्पद घटना नेहमी पोलिसांना कळवण्याचे आवाहन करण्यात आले आहे.

परिसरात खळबळ आणि नागरिकांची चिंता
दिवाळीनिमित्त शहरात वाढलेल्या गर्दीच्या काळात वर्दळीच्या परिसरात चोरीसारखी घटना घडल्याने स्थानिक नागरिकांमध्ये मोठी अस्वस्थता निर्माण झाली आहे. शाहूपुरी परिसरातील या चोरीच्या प्रकारामुळे येथील रहिवाशांनी आपली सुरक्षा अधिक काटेकोर करण्यास सुरुवात केली आहे. पोलिसांनी आगोदरच सजग राहण्याचा सल्ला दिला आहे आणि परिसरात पेट्रोलिंग वाढवले असल्याचे सांगितले आहे.

दरम्यान, दिवाळीच्या सणाच्या पार्श्वभूमीवर रात्री उशिरापर्यंत नागरिकांची वर्दळ असणाऱ्या भरवस्तीत अशी चोरी होणं प्रशासनासाठी मोठं आव्हान आहे. तर भविष्यात अशा घटनांवर नियंत्रण ठेवण्यासाठी पोलिस आणि प्रशासनाने उपाययोजना करण्याची अपेक्षा नागरिकांकडून व्यक्त केली जात आहे.